7 حاجات تعملهم لو انت مخنوق او مكتئب
مرحبا بكم متابعين موقع معاذ اشرف 👑
الاكتئاب بيجي لناس كتير مننا أوقات بيحس أنه مخنوق ومتضايق أغلب الوقت وقاعد زهقان والطاقه بتاعته بتقل مش عاوز يقوم من مكانه ولا يعمل حاجه والحاجات اللي كان بيحب يعملها مبيعملهاش وشهيتك بتفقدها ومبتعرفش تنام بسهوله وبتبقي حاسس انك محطم من الاخر لذلك أخترنالك 6 حاجات ممكن تعملهم يقلووا من خنقتك أو اكتئابك.
1- أتفرج علي افلام ومسلسلات
مشاهدة فيلم أو مسلسل أو برنامج أو عرض كوميدي بيضحكك أو أنت بتحبه هيساعدك في تحسين حالتك المزاجيه شويه وطبعا مفيش مانع من شويه تسالي معاه شويه فشار ، او تسالي أخري زي كيس شيبسي عائلي.
2- أتمشي شويه
مش هقولك بقي كلام صحي وبيقلل من الإصابه بالضغط والسكر وبتخسس وتحرق دهون وبتنشط الجسم ومش عارف ايه بس فعلا لو أتمشيت شويه وشميت شويه هوا نضيف هتحس بأختلاف شويه وتحسين حتي لو طفيف يفضل وقت ما بعد الفجر لحد الشروق وياسلام لو علي البحر او الكورنيش.
3- أتكلم مع حد بتحبه
شوف مين الشخص اللي بتحب تتكلم معاه أو بتحب تقعد معاه وبتفرح لما تشوفه أو تتكلم معاه وروح أقعد معاه وكلمه ، علماء النفس بيقولولنا أن الأصدقاء بيقللوا من الإصابه بالأكتئاب عشان نشاط إجتماعي بتتكلموا مع بعض وتهزروا وتضحكوا وتخرجوا لذلك شوف صاحب أو صاحبتك روح أقعد معاه وأتكلم معاه وفضفض ولو بتحب شخص وبعيد عنك كلمه علي النت المهم فضفض لحد صدقني هتستريح شويه لما تطلع اللي جواك خصوصا لو لحد بتحبه هتبقي كما قويت العلاقه بينك وبينه.
4- أسمع الحاجه اللي أنت بتحبها
سماع الموسيقي أو الأغاني بيحسن من الحاله النفسيه عندك كيميا جواك بتتغير فيه ماده أسمها الأندروفين بتتفرز في المخ بتساعدك علي التخلص من الالام والعالم أبن سينا نصح بسماع الأغاني لتحسين الحاله النفسيه وقال قبل كده أن مسكنات الاوجاع ثلاث : المشي الطويل ، الغناء الطيب ، الأنشغال بما يفرح الانسان. وطبعا مفيش مانع إن فيه ناس بتحب تسمع قران ، القران بردو كلام ربنا وبيحسسنا بالراحه في الأخر أعمل اللي يريحك واللي تحسه هيبسطك.
5- روح مكانك المفضل
روح المكان اللي أنت بتحبه اللي أنت بتحس فيه بالراحه أو البهجه او الهدوء أو المكان اللي بيفرحك أو بتحب تقعد فيه مش شرط يكون هادي ممكن يكون البحر القهوه حديقه عامه أي حته بتحبها وممكن تاخدها مشي لو قريبه وتسمع مزيكا وأنت رايحلها وممكن تاخدلك كام سيلفي.
6- أعمل خير
أعمل أي عمل خير هيبسطك أوي وهيشعرك بتحسن ، أنت ممكن تعمل حصاله وتحط فيها مثلا أي كوين يتبقي منك من شراء أي حاجه وأخر الشهر تطلعه صدقه أو ممكن تتبرع بالأكل الزايد عندك لأي حد محتاج أو تتبرع بهدومك اللي مش محتاجها او ممكن تعلم حد تعرفه عربي وحساب لو هو كبير وامي ، جارك مثلا ، أي حاجه من الحاجات دي ممكن تساعدك كتير وتشعرك بالسعاده والفرح والرضي عن النفس وأنك عملت حاجه كويسه.
7- البكاء
انك تلبس السماعه بتاعتك وتسمع موسيقي حزينه وتبدأ انك تفتكر حاجات مؤثره في حياتك وتعيط دي حاجه هطلع الطاقه السلبيه اللي جواك وبعدها هترجع أقوي من الأول لاكن كونك حزين ومكتئب وكاتم جواك دي حاجه بالعكس هتضعفك وهتكتأب أكتر.
دي الحاجات اللي جات في بالنا وقولنا نشاركوا بيها ونساعدكوا ، أنتو كمان شاركونا في التعليقات لما بتبقوا مخنوقين بتعملو ايه؟